يعانى الشعب المصرى من فوبيات عديده
اهمها "التبريروفوبيا"
يشتم ويتريق ويلعن فى اللى ماتو ويبرر سبب كده بتبريرات سخيفه دنيئه
اليوم بكتب وانا مضايقه
الكلام مش هايقدر يوصلكوا حالتى النفسيه
بس انا بكتب علشان اطلع كل اللى جوايا
نفسيتي ماتستحملش اكتر من كده
بعد كل الضحايا اللى شفتها والمناظر واصوات الرصاص والدخان
وييجي واحد قاعد فى بيته نايم على سريره فى التاكييف
ويصحى على الجاهز يشوف المجازر اللى بتحصل وتوصله الأخبار على النت
ويقولك احسن ويستاهلو
ويبدأ وصله التريقه
والكوميكس و البذائه الكلاميه
يبقى يلعن ابو اليوم اللى عرفتك فيه يا اخى
شخص عديهم الأنسانيه لاتستحق لقب انسان
بأى ذنب قتلوا؟؟
بذنب الدفاع عن الحريه ؟
بذنب رفضهم للأستسلام للأستبداد و العبوديه؟؟
ماذنب بشر يرفضون ان يعيشو حياه الذل والخضوع التى تشتاقون اليها انتم؟؟
ماذنب بشر يرفضون تسليم انفسهم الى المجرمين والقتله الذين قتلوا اخوانهم
فى ثوره 25 يناير ولم يؤخذ حقهم حتى الأن فى حين انكم كنتم يداً واحده معهم
متظاهرين بمحاربه الأرهاب عن اى ارهاب تتحدثوا يا سااده ايخيفكم المصحف والسجاده
التى يحتمون فى رحمتها !
ما ذنبنا ان نعيش مع من يلعقون احذيه الرؤساء ويخضعون خضوعاً تاماً خوفاً
من هلاوس عقليه فى رأيهم ؟
اقسم بالله الحكايه مش حكايه اخوان الحكايه حكايه شعب اتهان
الاعتصامات فيها ناس من كل الاعمار ومن كل الفئات والطبقات بس انت مغمض
عينيك ومش عاوز تشوف
شيل الحاااجز اللى بينك وبينهم
بطل تتفرج على قنوات العهر اللى كان ايام ثوره 25 يناير معتبراها نكسه
وكانت بتمجد فى النظام القديم و بتلفق تهم فى الثوار نفس اللى بيحصل دلوقتى
بالظبط
وكانت ساعتها قناه الجزيره هى اللى بتجيب الحقيقه
كنت ساعتها مصدقهم
لكن لما الموضوع دلوقتى مش على مزاجك قررت انك تحط حاجز وتعمى عينك عنهم
طب ماشى ياسيدي الجزيره كدابه
وقناه مش عارفه ايه ووحشه
ماتنزل بنفسك واتأكد وتصور اللى شوفتو ؟
حتى علشان لما تبقى بتقول كلام يبقى معاك الحجه والدليل انك نزلت وشوفت
بعينك
وماتبقاش بتقول كلام مرسل سامعو من حد ولا البقال اللى تحت بيتكو قالهولك
انت مش مدرك انك هاتتحاسب على ده كلو؟؟؟
طب بلاش
مش مدرك مستقبل اولادك هايبقى عامل ازاى لو فضلت البلد دى كده؟
بتتنهب بتتسرق و بيموت ولادها وانت واقف تتفرج؟؟
طيب هاتقول ايه لولادك لما يشوفو فى بيت جدتهم صوره اخوك الشهيد
"فلان" متعلقه على الحيطه ويسألوك مين ده يا بابا ومات ازاى؟؟
هاتقولهم ده اخويا اللى انا نزلت فوضت لقتله وساهمت فى قتله علشان انا طماع
وكنت عاوز احقق اللى فى دماغى وفى دماغ طرف واحد بس وطظ فى باقى الأطراف !كنت عاوز
الغيهم من الحياه لمجرد انهم مختلفين معايا سياسياً مع ان ده حقهم الشرعى؟
ولا هاتتكسف وتحط وشك فى الأرض وتقول ياريت اللى جرا ماكان!
الاعتصامات سلميه من وقت مابدأت
والقتل فيهم بأبشع الصور
والذنب الوحيد انها سلميه
لكن كفايه سلميه لحد كده
حقنا بيضيع وحق شهدائنا واولادنا بيضيعو ياريت تاخدو موقف
عاوزين حق بلدنا المنهوب وحق شهدائنا واطفالنا
بس خليك حاطت فى دماغك ان لو ماعرفناش نجيبو بنفسنا فى اخره بيننا وبينك
طبعا كل واحد بعد مايقرا الموضوع ده اذا كان قراه :D
هايقول انى اخوان
لكن اقسم بالله العظيم انا مش اخوان ولا عمرى انضميت ليهم
الحكايه كلها انى ماقدرش اشوف الحق قدامى واسكت وابقى شيطان اخرس
شكراً ليكو انكو استحملتو الرغى الكتير
واسفه اذا كنت قلت لفظ خارج
اكيد فى كلام اكتر من ده جوايا بس ده اللى قدرت اقوله فى الحاله دى
واللى مش عاجبه كلامى يعتبره هرى زى اى هرى بيكتبو يعنى
هرى ب هرى مالناش حق نهرى احنا كمان !
واحب اقولكو
استمروا فى تبرير مشاعركم الحيوانيه علشان تبقوا بتتفرجو كده وانتو حاسين
انكو مش مذنبين فى حاجه
هنيئاً لكم الذل !!
